钱伟

　　前段辰光，看到女儿勒了读世界名著，心里厢一开心，平常读郭妮小妮子青春小说额朋友也开始读名著了，可能是想内涵起来。
　　有空额辰光，我翻了翻，发觉名著额厚度跟过去差不多，不过里厢额排版好像松垮了点，于是仔细阅读了起来，想晓得编辑是哪能可以勒了格种篇幅里保留名著额精髓，没想到翻了后，发觉到底是快餐辰光，大言不惭刚名著，而且名著额名字写了封面高头一点也不难为情，而实际浪厢，最多也就算个故事梗概，对白额精彩、心理描写额细腻，吭吧浪荡才拨省略脱，只剩眼骨头勒了当中，而且还常常看到骨质疏松额印迹。
　　所谓额精华，常常就是格种么事——刚了实实好听，实际浪厢也就是一般料作。就像有种嘎护肤品，好像撒个成分才有，又是茶酚，又是维生素C，还有撒个独创额成分，广告浪厢直接拨侬暗示：可以多少天里让侬看出效果。有种嘎宁不怕巨，一塔聒子没多少钞票还要硬了头皮买回去勒了面孔浪厢穷塔，结果撒个效果也没，跟塔甘油没撒两样，伊还跑得去问BA，宁家跟伊刚伊额方法不对，需要照了说明书按摩，多少天里才能出效果。实际浪厢不用格种精华，每天格能嘎按摩，效果也会得来，效果出来不是因为格个精华，而是按摩方法。没听到宁家美国皮肤科专家刚，普通额凡士林跟名牌护肤品99％额成分才差不多，差别只勒了格1％，而且皮肤额吸收能力并不像侬想像额嘎好。倒是中医额经络学，经常敲敲打打倒还可能为侬额美丽作出点贡献。
　　所以勒了全世界才为眼钞票炒概念额辰光，一个宁还是始终应该保持眼独立额思想。格能嘎就不会得勒了房价涨了100％额辰光，自家还刚刚温饱就去弄套房子背身债白相相，也不会得勒了股票已经跌到价值内还拼命勒了地板浪厢拐。独立额思想靠几本骨质疏松额名著缩略本是不可能具有额，还是要老老实实读眼大部头，可能里厢有所谓额糟粕，但就是糟粕还是侬自家剔除要比宁家帮侬剔除来得好，更何况侬哪能晓得格个宁家究竟勒了阿里一只台阶，晓勿晓得该剔除眼撒不该剔除眼撒，万一剔除额才是眼里脊留下来额才是奶扑肉，侬不是只好跟了后头阿浦阿浦？