孙洁瑾

　　上海滩吃额物事真是数不胜数，满眼望过去，不管是闹市商业区还是僻静额居民区，少不得有条街浪，各种各样，各地菜式额餐厅开勒了，夜畔时分，周末辰光，里厢举杯换盏，人头攒动。当然罗，上海人也的确欢喜吃。各两年，上海流行吃火锅、吃新概念川湘菜、吃小龙虾、吃日本、韩国料理……吃来吃去，突然有一天我想吃吃自家上海菜了，结果寻了一爿本帮餐厅，坐下来一看菜单，扉页高头迭能介绍：本店聘请名厨，掌勺本帮、粤式、川湘百味。迭种百搭手艺，可想而知菜额味道也就属于串烧，各种来一点了。于是，就更加想尝尝正宗老上海额味道了。
　　记忆当中额老上海味道是小辰光，清早，帮外公发嗲骗了零碎一元昂佃，然后跑到旁边弄堂额便民饮食店里，叫一碗3角5分额柴爿馄饨，一两2角5分额皮薄汤多底脆额生煎馒头，吃得来小肚皮迭出，然后良心发现拿剩下来额2角5分换一副大饼油条回去拨外公吃，外公还会得夸自己是懂事体额好小囡。再大一点，拨外公外婆带到四川北路额德大西餐社去吃牛排西餐。印象当中，推开“厚重”额门，扑面而来是浓浓额咖啡香帮婉转悠扬额钢琴声。有吴侬软语额侍者，白发苍苍额老克拉食客，我坐了皮革已经有些开裂额火车座位置浪，吃牛排前餐额色拉，看看只有一点点，但是土豆泥又松又软伴着香，真额哈好吃。然后一边听外公帮自家讲吃西餐额礼仪，一边叉一小块切下来额牛排送到嘴巴里，哇，齿颊留香。
　　交关年数以后额今朝，再回到外婆家，旧式弄堂老早拆迁盖了高楼大厦，柴爿馄饨么了，倒多出来一爿金师傅馄饨，门口也兼卖生煎，尚存半锅无人问津，帮当年一出炉，后头就排牢队拿刚宗锅子买了装回去额热闹场面不可同日而语。至于已经有了百年历史，原来叫德大牛肉庄额西餐社也拆迁搬场了。寻了一圈，发觉交关老上海额味道才走了味，变成了另一种杂陈的新上海味道，多少有点怅然若失。
　　也许，新上海味道有一天也会变成老上海味道，上海本就是个去陈出新额地方，而有人需要，真正值得留下来额，只要耐心搜寻，依旧可以寻到伊额踪迹。就好像后来我打听到德大西餐社以后为得搬到南京路重新开张，而更多额其它新旧味道依然等牢阿拉去慢慢品味，就好比品味这生活一样。