老同学自以为到国外镀过金，学过所谓格标准英格里西，回到上海跟大家聚会，谈谈白相相。蛮有劲格是伊动勿动就弄几句阿拉听勿清格外国口语，阿拉实在屏勿老就问伊：侬到底想讲啥么子，弄的一息息上海闲话，一息息吗弄几句洋泾浜格英格里死，侬以为侬讲格外国闲话老标准是伐，人家老克勒英文八级现在是领事馆的翻译还没么像侬中勿中，洋勿洋，侬晓得洋泾浜是啥格意思伐？

　　洋泾浜老早阿拉上海格一条河浜，由于当时租界原因，河南河北各种各样格洋人讲各种洋话，弄得上海人学还学勿像。好比老早交关各个省市人到上海工作，读书要学习上海话一样，一息息讲自己地方方言，一息息本地话，大家一致公认迪格就是洋泾浜闲话。现在有交关外国人，外省市人到上海，住在各个上海格小区里，为了融入上海学讲上海闲话，刚刚开始学就有眼眼洋泾浜，还会得弄出交关格笑话。所以讲为了让大家学会上海闲话出版了交关上海闲话格书，交关人学了老起劲格，就是勿想让别人讲是洋泾浜而已。

　　说来外国人来学阿拉上海闲话迪格就才叫做真正格洋泾浜了。会几句洋泾浜闲话勿是坏事体，现在阿拉上海对外开放了，要跟人家外国人交流交流嘎嘎三糊，勿会一眼洋泾浜哪能来四。奥运会，世博会在中国开要会一眼眼洋泾浜闲话，勿管侬会讲日本话、英语、韩语，总之到辰光可以跟人家外国人交流交流，就是洋泾浜也呒没啥关系，毕竟阿拉勿是伊拉本地人，能讲两句伊拉国家格闲话，伊拉开心还来勿及。